ምብላዕካ ዝለመደስ ክርእየካ የምብሃቑ ፡

ኣብዚ ምዕቡል እዋን እውን እዚ ዓይነት ተንኮል ብምዕቡል ሓሶትን ኣገባብን ቀጻሊ እዩ ዘሎ ንክትበልዖ ዝደለኻ ኣቦጉምባሕሲ ዓጋዜን በላ እዩ ፡ ፋሕተርተር ኢለ ብጽፍረይ ዝረኸብኩዎ ብበረኽት ይኣኽለኒ እዩ ዝበለ ፡ ኣይፋሉን ጥሜትን ሕማምን ስለዘካ እዛ እዋን ኣይትሓልፋን ኢኻ’ሞ ባዕላትና ኣመንጊግና ከነብልዓካ ፡ ልሙስ ኩን ፡ ድሕሪ ኣካላዊ መልመስቲ ናይ ኣእምሮ መልመስተውን ክውቀረካ ኣሎዎ ፡ እንተኣቤኻ ሽዑ ኣብኣ ትዴኻ ፡ መኽንያቱ ነዚ እኬይ ተግባራት ዘፈጽሙ ካብ ጎንታትካ ዝተመልመሉ ስለዘለዉ በጸረርታ ኣብህዋሳትካ ዝኣተዉ እዮም ዝመስሉ ፡ ንምዕሳብ ፡ ዘብዘብ ክብሉ ክኣ ዝኸጅሉ ፍጥረት ኣይኮኑን ፡

ሕማም በልሽውና ፡ ከም ሕማም ኣነሶ ፡ ተላቢዑ ከምዝዓቢ ገይሮም ፡ ኣብ መንጎ ሓድነትካን ባህልኻን ኣትዮም ከም ብላይ ነጸላ ፡ ተለጊብካ ውቐይ ከምዘይትኸውን ይሰርሑኻ’ሞ ፡ ድልየቶም ንኽረኽቡ ዝኽልክሎም ሓይሊ የሎን ፡ናቶም መሳርሒ ኮይነን ዘሎዋ  ህዝባዊ ምርጫ ፡ ሕጊ ፕረስ ፡ መሰለ ደቂሰባት ፤ ወዘተ… ክትሰምዐን ምዓር ዝጥዕማ ፡ ብተግባር ክትርእየን ግን ፡ ኣብቲ ጸልማት ዝስራሕ ተዋስኦ ፡ መፈጠርካ ዘጽልእ’ዩ፡ ነዚ ምስጢር ተበላሒትካ ምስእትፈልጥ ፡ ጸረሰላምዶ ግበር ሽበራ ተባሂልካ ፡ ንሃድን  ትፍረድ ፡

ጎብለል ብኹሉ ኮይኖም ኣይተሳፍሕ ኣይተኮርመ እናበሉ ዝሰርሑኻ ይጠፍኦም ፡ ዓመጽ ግፍዒ ምስእድያቱ ኮይኑ ፡ ነቲኣ ዝተፈጠርካላ መዓልቲ ክትራገም ትውዕል ፡ምርጋም ግን ሕልፈት ስለዘይብሉ ፡ ድሕሪ ሞት ጥዕና ቅበጽ ከምዝብሃል ፡ ነዚ እኬይ ውዲታቶም ፡ ህዝቢ ኤርትራ ኣቐዲሙ እዩ ነቒሕሉ ፡ እምቢ ንመግዛእቲ ኢሉ ብነድሪ ሓንሳብን ንሓዋሩን’ዩ ተላዒሉ ፡

ክብርኻ ፡ ናጽነትካ ፡ ብትካቦ ወይ ብጉንዖ ፡ ወይክኣ ክቡር ደምካ ባይታ ከየንጠብካ ርሃጽካ ከምፈለግ ከየዛረኻ ፡ ክረጋገጽ ስለዘይካአል ፡ ብሰላማዊ መንገዲ ንሰላም ሓቲቱ  ሰማዒ ምስ ስኣነ ፡ በቲ ዝሰምዕዎ ቋንቋ ክሟጎቶም ተገዲዱ ፡ ተሰዊኡ ክኣ ወናኒ ዕድሉ ክኸውን በቒዑ ፡  ዕረ እናጥዓሞም  ታሪኻዊ ስዕረት ይስዓሩ ድኣምበር ፡ ዳርጋ ኣብ ዝበጽሕዎ የብሎምን ዝዓይነቱ ፤ ካብ ምንብህቛውሲ ዓዲ ኣይውዓሉን ፡

ብጽፍርና ፡ ከምናይትማሊ ቃልሲ ንናጽነት ፡ ሎሚ ክኣ ምርግጋጽ ንቁጠባዊ ሓርነት  ኢልና ኣብዝተበገስናሉ ፡ ከም-ማሕታ በርቂ ንሕዱር ሸውሃቶም ስለዝሰባበሮ ፡ ድሕዝዎን ዝገብርዎን’ዩ ጠፊእዎም ፡ ንሶም እቶም ታሪኻዊ ጸላእትና እዮም ፡ ካብዝን ካብትን ሰበብ ኣላቒቦም ፡ ንዕኡ ዘተግብር ሃሱስ ዝቡይ ኣዋዲዶም ፡ ትልኽ እናበሉ ኣብ መንጎ ህዝብታት ግጭት ምጉሁሃር ምብራዕ እዚ እቲ ቀንዲ ውዲቶም እዩ ፡ ንሱ ስለዝኾነ ንቀርኒ ኣፍሪቃ ሃልሃል ዝብል ሲኦል ዝኾነ መጋርያ ወሊዖምሉ ፡ ነዚ ሃልሃልታ ምእንቲ ሰላም ደቂሰባት ፡ ከቕህም ዝቃለስ ፡ ግብረሽበራ ፡ ጸረ- ሰላም የጠምቕዎ ፡ እቲ ናቶምሲ እንዳማቶም እዩ ነገሩ ፡

ሓቂ ግን ንመደናገርትን መዝመዝትን ተሕቅቕ እምበር ኣይትቕበርን ፡እዚ ብተግባር ፡ ቃልሲ ህዝቢ ኤርትራ ህያው ዝገበሮ ፡ ንሓወልቲ ውጹዓት ዝወረቐ ህዝቢ እዩ ፡

    ሰማዕታትና ክቐስኑ ፡ ዕላምኦም ብተግባር ከነሰንዮ ይግባእ !

---