ንብዓት ሓርገጽ!!

ስለዚ ብቓላት ‘ናይ ሓባር ኣዳላዊ ሽማግለ’ እዚ ሰላማዊ ሰልፊ፡ ካብ ሃንቀውታ ህዝቢ ዝተበገሰ ዘይኮነ፡ ብዊንታ ተቓወምትን ሲቪካዊ ማሕበራትን ዝተወሰነ ኢዩ። መን ንመን ይውስነሉ ዝብል ኣገዳሲ ሕቶ ንጎኒ ገዲፍካ፡ እዘን ተቓወምትን ሲቫካዊ ማሕበራትን ዝበሃላ መን-መን ኢየን? እተን ወግሐ-ጸብሐ ኣብ “ኩርሲ-ዙፋን” መን ተወጠሐ ብዝብል ነንሕድሕደን ዝመናጨታ ድየን? ዋላስ ዓለማዊ እባ ሃይማኖታዊ፡ ኣውራጃዊ እባ ብሄራዊ፡ ብማለት ካብ ሓደ ጫፍ ናብ ካልእ ጫፍ ዝጻፋዓ ሰብ መትከል-ኣልቦ ኢየን? ዋላስ ኣብ ሳልሳይ ወራር ደድሕሪ ወያነ ዞኽ-ዞኽ ብምባል ኤርትራውያን ኣዴታት ዘድፈሩን ድስቲ-ኩስኩስቲ ዝፈገሩን ኢዮም? ዋላስ ነቲ ጭዋ ናይ ቃልሲ ባህሊ ንምብላልን ኣብ ዓለም ዘለዎ ክቡር ቦታ ንምሕካኽን፡ ኤርትራ ኣብ መዝገብ ግብረ-ሽበራውያን ክትሰፍር ኣለዎ ኢሎም ዝምጉቱ ኢዮም?

ኣንቱም ሰባት ካብ ዲሞክርሲ ተጓዕጺጹ፡ ዲክታቶር መጺኡ እንዳበልካ ካብ ምቑዛምሲ፤ መሬትና ተጎቢጡ፡ ልኡላውነትና ተጋሂሱ፡ መሰለት ሃገርና ብዘይ ኣገባብ ምእንቲ ረብሓ ወያነ ተደዊኑ ኢልካ ምጉያይ’ዶ ኣምበይምሓሸን?

ኣብ ጸረ-ሃገር፡ ሃሱሳት፡ ከደምቲ ሓያላን ኢና ናይ ዝብላ ሃገራት ኣብ ዝወደብዎ ሰላማዊ ሰልፊ ተሰሊፉ ዝውዕል ኣይክህሉን ኢዩ። እቲ ምድንጋር ክጥዕሞም ነቶም ትማል-ትማል ዝኾነ ስጉምቲ ክወስዱሎም ዝህንደዱ ናይ ዝነብሩ ሰባት ኣስማት እንዳልዓሉ፡ ኮር ተገልበጥ ምእንታኹም ሰልፊ ንገብር ኣለና ኢሎም ኣውያት ምዝርግሖም ኢዩ። እዚ ንብዓት ሓርገጽ ይበሃል። ሃገር ብጉልባብ ሰብኣዊ መሰል ኣብ ዕዳጋ ኣይትወርድን ኢያ። ህዝቢ ኤርትራ “ስጋ እዛ ሃገር” ኢሉ ስለዝመሓለ፡ ራሃወ-ጸበበ ምስ ሃገሩን መንግስቱን ኢዩ። እንኮላይ እቲ ብግዝያዊ ውልቃዊ ጸገማቱ ትሽቅጡሉ ዘለኹም!!!!

ሓራን ልኡላዊትን ኤርትራ ንዘልኣለም ትንበር!!

ወትሩ ዓወት ንሓፋሽ!!

ሄኖክ ሓበን ተ.

(ጀርመን)

---