ቁንጣሮ ካብቲ ብረኩት ፡ ጥቕሲ ናይ ሓርበኛ ኣቦና ኣቶ ወልድኣብ ውልደማርያም ፡

ሰሙናዊ ጋዜጣ ቁ.75 … ዕለት 31/01/1944

እቲ ናይሓቂ ሰብ ቅድሚኩሉ ነቲ ፈጣሪኡ መድሓኒኡን  ማለት ንኣምላኽ ከፍቅር ይግብኦ ፡

ቀጺሉ ንስድራቤቱ ከፍቅር ፡ ቀጺሉ ድማ ንሃገሩ ክፍቅር ይግብኦ ፡ እቲ በዚ መንገዲ’ዚ ተር ኢሉ ዘይኸይድ ስብ ፡ ሃገረይ የፍቅር’የ ዝብል ናይ ብሓቂ ግጉይ እዩ ፡ መኽንያቱ በቲ ሓቀኛ መንገዲ ስለዘይመጸ ፡ ( ሓደ  ንወለዱን ንኣሕዋቱን ዘየፍቅር ስብ ፡ ከመይ ኢሉ ንሃገረይ የፍቅር እየ ዝብል ? )  ፍራሃተ ኣምላኽ ዘይብሉ ሰብከ ፡ ከመይ ኢሉ ፍቕሪ ህዝቡን ሃገሩን ፡ ክብረት መንግስቱን ክህልዎ ?

ፍቕሪ ተፈጥሮ እዩ ፡ ግናኸ ፍቕሪ ትምህርቲ እውን እዩ ፡ ስለምንታይ ዑፍ ከይተረፈት ቤታ ተፍቅር ? ወኻርያ ከይተረፈትውን ጉድጓዳ ተፍቅር ? ፍቕሪ ናይብሓቂ ትምህርቲ እዩ ፡ መኽንያቱ በዚ ኣብላዕሊ ከምኣብነት ተጠቒሱ ዘሎ መንገዲ ስለዝኸይድ ፡ በዚ መሳልል ገይሩ ክኣ እናደየበ ፡ ኣብ ፍቕሪ ሃገሩ ይበጽሕ ፡ በዚ ሓቀኛ ፍቕሪ ተኾስኪሱ ዝዓበ ሰብ ፡ ምእንቲ እቲ ዘፍቅሮ ህዝቡን ሃገሩን ፡ ሂወቱ እውን ከይተረፈ ክብጀወሉ ቁርብነቱ ዘረጋገጸ እዩ ፡  

  ሃገር ማለት ፡ እምባታት ጎላጉል  ውሓይዝ ቀላያት ኣደራሻት ሓወልትታት ኣይኮነን ፡ ሃገር ማለት ሰባት ፡ ( ህዝቢ ) እዩ ፡ እቶም ኣብ መሬት ኣቦታትካን መሬትካን ዝነብሩ ፡ ሕብረኻ ዝሕብሮም ፡ ልሳንካ ዝልሳኖም ፡ ሳባት ፡ ንሳቶም እዮም ሃገርካ ፡ ንኣታቶም ዘይተፍቅሮም እንተድኣ ኮይንካ ፡ ሃገርካ ዘይተፍቅር ሰብ ምዃንካ ኣጸቢቕካ ተረዳእ ፤ እንተሃብተምካ ፡ እንተፈከርካ ፡ ኣብ ህዝቢ ሽብን ጉብን እንተኣእቶኻ ፡ ፍቕሪ ሃገር ዝመስሎም ብዙሓት ዝተደናገሩ ኣለዉ ፡ እዚ ግና ካብ ነብሰ ፍትወት ሓሊፉ ፡ ፋሺዝሞ ኢዩ’በር ፍቕሪ ሃገር ኣይኮነን ፡ ፍቕሪ ሃገር እቲ ቀዳማይ መሰረቱ ፡ ፈሪሃ እግዝኣቢሔር እዩ ፡ እቲ ካልኣይ መሰረቱ ክኣ ፍቕሪ ብጻይካን ጎንኻን ሃገርካን እዩ ፡ እቲ በዚ መንገዲ’ዚ ንሃገሩ ዘፍቅር ሰብ ፡ ምንም እኳ ካብኩሉ ዝወሓደን ዝደኸመን እውን እንተኾነ ፡ እቲ ካብኩሉ ዝበርትዐን ፡ ኣብ መወዳኢትኡ ክኣ እቲ ዝዕወት ንሱ እዩ ፡ ስለምንታይ ብሃልሃልታ ፍቕሪ ዝተነድቀ ሓድነት ፡ ንሓጺን ስለዘምክኽ ፡  ስለዚ ኣብ እትገብሮ ኩሉ ዓወት ክትረክብ እንተደሊኻ ፡ ህዝብኻን ሃገርካን ኣፍቅር ፡ ንፍቕሪ ሓደእኳ ከሰንፋ ኣይክእልን እዩ ፡ ፍቕሪ ንሓቂ ክትደሊ ኮቶ ኣይክትሕለልን ኣይክትድሃልን እያ ፡ ኣብ መወዳእትኡ ክኣ ፡ ንሓሶትን ብድዐን ቀቢረን ፡ ፍቕርን ሓቅን መሳንይቲ ስለዝኾና ፡ መናብርቲ እየን ፡ እቲ ህዝቡን ሃገሩን ዘፍቅር ኩሉ ግዜ እታ ዓወት ናቱ እያ ፡

 ዓወት ንሓፋሽ !

---